有線電視可能執笠，係一個新聞界好壞嘅消息。左丁山自有線開台至今，都係訂戶，試過好幾年每個月交七至八百蚊月費，算係大客戶嚟㗎，但講真一句，有線電視除咗新聞台之外，其他頻道確係冇乜吸引力，連馬迷鍾意嘅18台，都受到網上賽馬資訊強力競爭，在馬迷心目中嘅重要性日漸淡化，左丁山有時睇吓，都係睇方駿輝賽後評述嘅啫。
有線電視早年獨霸，係黃金時期，now出現後，新聞雖有不及，但勝在價錢便宜得多，中環的商業公司機構，如要裝置收費電視，幾乎全部係now，左丁山試過問有線，價錢係幾千與幾百蚊（now）之別，如果係政府或者媒體就一定裝有線啫（因為新聞台之故），其他一定係訂now，點解有線要收咁貴？幾難明。
家庭又點？now自從大灑金錢，搶晒英文體育台，HBO電影及英超聯之後，訂戶日益上升，相反，有線就不進則退，漸漸失守，到而今只靠新聞台撐住大局，但新聞台從來都係蝕本中心，好難賺錢嘅啫，好似左丁山一家咁，睇新聞就一定係睇有線新聞台，睇完新聞就轉番去now睇電影與體育節目，每月嘅有線訂戶費已下滑到最低消費嗰隻。
會德豐、九倉宣佈不會再注資有線之後，股價急升9%，總市值（於3月11日）據報上升增加咗237億港元，大股東吳氏家族得益不少，相信過往咁多年投資於有線嘅滾存虧損，完全一日收回幾倍有突，真財技高手也，吳光正係得嘅！至於有線電視，究竟有冇買家呀？市場傳聞吳先生與于先生曾經一度傾得好埋，幾乎成事，但兩位都係講價高手中之高手，最後都係爭少少，開唔到/嗌唔到價，於是好事告吹；如此一來，假若未來三四個月仍然冇買家有興趣嘅話，有線電視摺埋都唔奇，幾百個有線新聞員工可能要搵定後路，唔怪得趙應春與浸大校友聚會，彈一曲「獅子山下」，眼泛淚光，新聞界人士睇到，都暗自淒涼，誠恐下一個執笠嘅就係自己間報館。最近有一位世姪女話要憑DSE成績考入大學新聞系，左丁山即刻向佢父親潑冷水，新聞界搵工難，人工少，公司前景不明朗，讀新聞系入新聞界做記者，今天已變成浪漫主義，制唔過呀！呢位父親話：「我得一粒女，佢嘅成功要靠父幹，趁佢年青發吓浪漫夢，有何不可？」係嘅係嘅。