民主黨噚晚慶祝22周年黨慶，雖然冇請任何政府司長、局長出席，但就獲3名特首候選人畀面撐場，其他政界名人，包括由頭號梁粉變追殺梁振英嘅頭號悍將嘅劉夢熊、提名咗曾俊華嘅「田少」田北俊同周梁淑怡、同埋前立會主席「阿曾」曾鈺成。
而唔少民主派立法會議員亦畀面出席。不過論現場人氣度最高，就唔及連奶媽林鄭點名讚、老闆薯片叔曾俊華話有錢都買唔到嘅軍師羅永聰，而肥仔聰亦成為唔少賓客「集郵」對象，影相影唔停。
歌王獻唱籌兩萬
黨慶不設傳統拍賣環節，但就靠把口籌到唔少錢。出名係白鴿歌王嘅主席胡志偉噚日就打響頭炮，上台獻唱《萬水千山縱橫》一曲，獲冇現身嘅「潮州怒漢」詹培忠捐兩萬元贊助。
白鴿黨又特別製作搞笑短片娛賓，包括搵3名元老前立會議員仁哥、卿姐同單雞拍攝《尋找乳鴿的故事》，用搞笑方式畀貼士一眾乳鴿。乳鴿們亦親自上陣，拍攝唔同電影主題嘅惡搞片，要用演技競逐最佳議員獎項，點知最後奪得此獎，竟然係最近賣魚蛋牛丸打邊爐廣告，表情十足嘅前立會議員李華明！
李華明獲獎時都搞笑話：「我做議員時冇獎，我賣魚蛋你先畀個獎我？」透露唔少人喺廣告出街後，都問佢係咪「烚吓烚吓」，亦唔少人問佢攞腸仔食，李華明強調廣告中嘅食物，佢全部食過試過，仲去埋間食物廠睇過安全，先推薦畀大家食㗎！
李八方