「Rainbow首先呢個名易記啦，另外個意思係我希望係雨後彩虹，畀人有希望。」
上堂瞓覺﹑考試差唔多包尾﹑會考1分，呢個package你會點形容？25歲嘅何永亮（Rainbow），佢自稱，從前的確係一個不折不扣嘅廢青：「係廢青，未有咁大貢獻嘅時候，你都係一個廢青。」佢更形容自己懶散﹑頹…有得瞓就瞓。讀書不成﹑冇「生涯規劃」﹑ 冇方向、冇目標，就係從前嘅Rainbow。不過有一樣嘢，令佢唔再hea吓hea吓，仲令佢有番夢想。
今日何永亮（Rainbow）已經係一位得獎港產聖誕老人／快樂師。佢曾經代表香港遠赴瑞典參加被譽為聖誕老人奧林匹克嘅「國際聖誕老人運動會」並勇奪亞軍，同時間佢係歷來最年輕的參賽聖誕老人。最近佢更加成為YMCA即將出版嘅新書《拾．夢．者 ─ 十位青年的拾夢故事》裏面其中一位主角。
「讀完書出嚟唔知做乜好，就跟咗師傅，發覺表演魔術同扭氣球都幾好喎。」問到最難忘，佢話：「最難忘係代表香港參加聖誕老人比賽，去到瑞典耶利瓦勒聖誕老人村，最後仲攞咗世界第二番嚟 。」提起讀書成績，Rainbow就細細聲，好似好難開口咁；但係一講到魔術，佢就成個人「回魂」：「《街頭魔法王》入面，有幫過一啲魔術師手做幕後工作。試道具呀…幫佢set up呀。我仲有教班 ，學生由幾歲到60幾歲都有。」
「追夢」聽落好熱血，但追起上嚟，就真係一啲都唔容易：「當有節日嘅時候，可能有幾萬蚊或者更高嘅收入；但係淡季就可能得幾千。所以，淡季時會盡量教多啲班教，慳啲洗。有時都要問daddy借錢。」收入唔穩定，有時更加要將辛苦賺番嚟嘅錢，攞去買道具或者報比賽，但係Rainbow都冇諗過放棄。從前嘅「廢青」，今日講堅持，全因為魔術畀佢嘅快樂，Rainbow話：「去教班嘅時侯，啲同學一上堂就同我講『我有練到！我做畀你睇吖！』個感覺係填補番（銀行戶口入面嘅缺失）。最開心嘅時候係喺小朋友面前表演。」
最後Rainbow仲鼓勵番時下嘅年輕人：「唔好畀自己咁大壓力喺讀書度，因為就算你讀到書或者讀唔到書，年紀慢慢大，件事一定會過去。呢個時候你應該搵你自己鍾意嘅嘢，搵你想做嘅嘢。」如果你o依家考試壓力好大，覺得自己好冇用，係個廢青嘅話，不妨聽吓過來人嘅肺腑之言，去搵番自己嘅夢想啦！路又點止得一條。
有興趣親身見吓Rainbow，可以喺呢度搵到佢：
《拾夢市集－手作 X 音樂 X 新書 X 茶座》
日期：2017年3月19日 (星期日）
時間：中午12:00 –下午6:00
地點：青年會專業書院地下 (九龍油麻地窩打老道23號)
記者：植詠珊（Cathy）
攝影：Neo﹑馮峰
編﹑導﹑剪：Kaman