電盈主席「小小超」李澤楷罕有講政治，日前接受訪問開腔講林鄭，算係近年破例，之不過唔講政治，唔代表冇留意，噚日電盈開股東會，有股東問佢鍾意自己間nowTV入面邊個節目，小小超就話最鍾意睇新聞台《政情》。
佢自爆3星期前仲打電話去新聞部，讚個節目做得好，「亦都同佢哋講，唔好搞到主席會有好多政治嘅麻煩，當然佢哋有編採嘅自由啦」。《政情》近期主要報道特首選戰，爆西環落力為林鄭箍票，而《政情》同特首辦都時有交手，唔知有冇為小小超帶來政治麻煩？nowTV近年趕過有線，成為本地收費電視龍頭，小小超話對有線電視唔做有少少驚訝，仲讚有線強項係新聞部，話就算nowTV新聞台冇錢賺，都要搞新聞台，事關咁樣成個套餐賣畀客戶，人哋至覺得值錢㗎。
小小超攞免費電視牌搞ViuTV，雖則《跟住矛盾去旅行》第二季有啲政治麻煩，抽起王丹、梁天琦嗰輯，播映無期，但佢長遠睇好免費電視。皆因收費電視做後台，免費電視成本低過同行，雖然3、4年內唔會賺錢，但第時可帶起公司估值。