雖然手握580個提名，又有中央加持，禮賓府已近在眼前，但據聞林鄭都繼續「有為」，密密見團體，為佢未來嘅鴻圖大計收集意見。
噚日佢就「密會」香港青年聯會同明匯智庫成員，聽吓對方有乜政綱建議，睇吓有冇英雄所見略同之處。其實見奶媽政綱大打青年牌，包括畀多啲機會佢哋參政，就知佢對年輕人未來發展非常關注，有份與會嘅青聯主席吳傑莊引述奶媽指，若果能夠成為特首，將會協助年輕人「三業」，即係學業、事業同置業，重申支持青年參政議政，仲特別表明會為青年創造上車機會，兼提供更多發展空間。
據知青聯同明匯智庫仲向林鄭送見面禮，就係多達60幾個香港青年團體對未來特首施政嘅建議書。據八方了解，青聯淨係向林鄭提出青年人對特首政綱嘅建議，並冇約見其他候選人噃，似乎係孤注一擲。睇番吖，身為選委嘅青聯主席吳傑莊提名咗林鄭，投票意向相當明顯嘞啩。