胡國興雖然喺3個特首候選人入面，屬勝算最低嗰個，不過正如佢自己講，鬥志仍然高昂，仍然對勝出好有信心，仲走去游說工聯會投自己一票，而胡官嘅「有信心」唔只用口講，仲用錢去證明。佢噚日就喺facebook貼文，喺紅隧巴士站外買咗個大型廣告板宣傳，話要陪着市民一齊等過海巴士，不過八方估計要用唔少錢。
其實之前好多隧道口廣告位，早就俾入唔到閘嘅葉劉霸咗，而且合約仲簽到3月底選舉結束，當時有報道話胡官都想喺隧道口買廣告位，但因消費太高，最終都要放棄，今次胡官咁落本宣傳，明顯佢真係想人覺得佢好有信心贏，唔係邊會離投票不足一星期，仲掟錢宣傳！