距特首選戰仲有唔夠10日，噚晚兩位特首候選人曾俊華同胡國興去咗麗思卡爾頓酒店，出席前布政司鍾逸傑爵士成立嘅「逸傑國際慈善基金會」25周年慈善晚宴，個晚會順道慶祝埋鍾Sir嘅90大壽，而「現在進行式」嘅梁特就帶埋老婆梁唐青儀捧場。
梁特喺人大升咗做全國政協副主席，都算係喜事，所以見梁太一身紅噹噹打扮嚟賀鍾Sir，同行仲有中聯辦副主任譚鐵牛。影大合照時鍾Sir好熱情掛住同譚鐵牛握手，握咗一輪先到梁特。除咗薯片同胡官，鍾Sir撐嘅葉劉淑儀都有嚟賀佢牛一。鍾Sir喺記者會講到葉劉未入到閘，依然會繼續支持，問佢𠵱家支持邊個候選人，鍾Sir就話：「無論哪一位當選也好，都會有很大的挑戰，希望能夠令香港更好。」講到最大挑戰係乜，「現時最主要的是要解決房屋供應問題，土地問題，其中方法是填海」。