【本報訊】尖沙嘴發生街頭搶劫案！昨午近4時，一名男子在彌敦道63號iSQUARE對開與一名女子發生爭執，其後更搶去對方銀包逃走，女子大叫「搶嘢」引來大批途人圍觀，更有見義勇為的途人加入追截。途經事發現場的徐小姐直言：「聽到有人嗌搶嘢，好多人衝去馬路嘅位置！」她亦跑往查看，赫見一名身穿紅衣大叔將一名男子擒住，並壓在地上，「個紅色衫阿叔都好大隻，個賊被人撳低，其他人都幫手踩住個賊啲手啲腳」，途人亦大讚捉賊大叔「好英勇」。
從徐小姐拍攝的片段可見，大叔使出一招「單臂十字鎖」，將賊人壓住趴低並反鎖其右手，賊人無法動彈，而蹲在賊人旁邊的一名女子則不斷幫忙求情：「唔好意思呀，放過佢啦！」惟紅衣大叔反駁：「你講咩都冇用，要等差人嚟！」事後警方到場，以涉嫌搶劫將南亞裔疑犯拘捕，並帶署調查。