梁振英玩語言偽術到極致，被謔稱為CY 2.0嘅林鄭月娥，真係青出於藍。明明話自己「從來唔做吹風會」，點知去過佢吹風會嘅記者大爆林鄭講大話，林鄭出席劉慧卿節目指，做發展局長時搞嘅係tutorial、即補習班，等傳媒明白政府文件，唔叫吹風會。
3年半冇請政助＝冇請過
卿姐即時追問，話奶媽舊年喺四川同傳媒私下會面、今年1月同傳媒講參選係擔心有人勝出而不被中央委任，呢啲同傳媒會面又算係乜？奶媽話前者係同傳媒飲杯嘢，後者就佢已離開政府，呢啲會面「叫做咩會，我都唔知」。講講吓，佢終於肯認自己搞過一兩次吹風會，但「唔係定期搞吹風會」。原來奶媽字典中，「唔係定期搞」同「唔搞」係一樣。
奶媽早前喺論壇上話佢冇請過政助，點知即時被人fact check，指佢請過田北辰前助理張秀麗做政助，佢又解釋話係想講「近3年半都冇請政治助理」，仲話外界捉住佢呢句唔太準繩嘅話指摘佢唔老實係要求高。原來「請過」同「冇請過」都係冇分別。