香港中文大學前校長、著名學者金耀基嘅「金耀基八十書法展」，噚日喺中環集古齋畫廊舉行開幕禮，是次展覽展出金教授80歲後創作嘅書法精選76幅，係佢首次個人書法展。
金耀基喺文化、藝術、教育界享負盛名，噚日開幕禮有逾200個嘉賓出席，主禮嘉賓包括前特首董建華、中大前校長劉遵義、著名作家、《蘋果日報》前社長董橋等等，台下則有中大現任校長沈祖堯、學者劉兆佳等。
笑指老董洩國家機密
董建華致辭時更大爆當年就任首屆特首嘅演詞，金耀基都有幫忙，金就風趣回應話對方透露「國家機密」，又話董半生為香港，明明比佢細兩歲，但佢睇起來可能仲年輕喎。董橋致辭時即場讀出學者余英時手寫畀金耀基嘅賀詞，金之後珍而重之咁收起張字條。金耀基八十書法展由噚日開始至本月20日於中環集古齋畫廊展出。