張曼玉自從同德籍建築師Ole分手之後，曾經同比佢細15年嘅混血band友Adrian傳緋聞，但張曼玉澄清過只係朋友。近日有周刊指，張曼玉分手之後「自閉」喺屋企，最近一次出嚟同家姐放狗散心都好憔悴，成個人消瘦咗落嚟。
劉嘉玲昨日喺灣仔君悅酒店出席活動，記者問起張曼玉一事，點知嘉玲未聽完問題，只係聽到張曼玉個名已經好大反應咁解釋：「哎呀，又嚟？我哋都冇見，其實我哋唔係好熟，只喺無綫拍戲見過，私下唔熟，呢個圈真係做到朋友嘅好少。」
至於周刊形容張曼玉放狗時神情憔悴、落寞，劉嘉玲：「落唔落寞係我哋出面啫，可能內心好豐富充實，活得好自在呢，竇唯一個人搭地鐵我都唔覺得佢落寞，覺得佢好自在呀，唔好成日用自己眼光同價值去評論。」