禮拜日（19日）為田草十場賽事兼用A跑道，由於跑道寬闊，後上馬可以盡展所長。
以最近2月19日同一移欄七場草地賽為例，後上馬佔壓倒性優勢，好似「銀豐神駒」、「有衝勁」、「喜旺寶」、「佳龍駒」及「赤兔寶駒」都係從中後叠衝上贏馬，靠後勁食糊馬值得優先留意。
今戰列陣馬中，角逐第五場四班1600米的「有衝勁」，上仗正是於2月19日田草A欄1800米後上贏馬，其練者李易達等番同一移欄配梁家俊再跑，睇部署有心想添食。
另外，爭奪第二場五班1400米的「大行情」，此駒唯一頭馬在田草A欄所得，亦係全場唯一贏過此移欄之參戰馬，憑較佳場地性能，何良找潘頓策騎下有機會贏馬補中。