工聯會立法會議員郭偉強兩個幾禮拜前仲同人分享考車牌一take過嘅成功心得，就係「有咁慢得咁慢」，佢話咁先有時間應付各種情況，原來佢講呢番說話時，有單不小心駕駛案在身，噚日裁定罪名成立，仲揭發佢有超速同違反交通標誌嘅定額罰款紀錄，結果佢俾裁判官罰款3,500蚊，遲啲仲要上駕駛改進課程。
單案喺舊年6月20發生，郭揸住私家車喺港鐵港大站薄扶林道巴士站cut線時撞到架載住輪椅人士嘅的士，的士司機噚日畀口供時話感到好強震盪力，好彩乘客冇受傷，只係車門凹咗。判刑後郭同八方講，需要同律師商量，先決定上唔上訴，佢又話如果裝咗車cam，個結果會好唔同，所以事發後立即裝咗。