港股一鼓作氣急升495點，每個板塊升幅平均，反正港股今日百花齊放，科網資金又冇被息口敏感股搶走，大家一樣升，毋須作太大幅度換馬同加碼。
恒指破頂，表面上睇係氣勢如虹，但加息冇預期咁密，過往經驗話畀大家聽難視為港股重估要素。再者，恒指升至比較接近月線圖保歷加上軸24573點，往績顯示，未來一兩個月內難以明顯突破呢個水平，換言之恒指較大機會只得幾百點上望空間，毋須太興奮，追入主流指數股容易中伏，反而最好精選啲買入二三線強股。
阜豐（546）之前明顯突破5蚊阻力後，星期二高開破頂見5.22元，然後急回至5蚊邊又有支持，噚日乘強勢再破頂收5.3元，試完車睇怕要開車。阜豐係內地味精龍頭，行業寡頭壟斷，預測2017年市盈率10倍左右，遠低過梅花生物A股嘅21倍，估值大有條件收窄。
阜豐下周二公佈業績，之前發盈喜估去年盈利升超過八成，當時數字已經高於大行預期，雖然大行相應上調盈利預測，但彭博綜合分析員平均預測每股盈利亦只係升八成，換言之阜豐業績差極都meet到forecast，業績前後股價睇嚟升得起。
晉佳
http://www.fb.com/advanceguy1
本欄逢周一、三、五刊出