食物及衞生局局長高永文醫生愛好美食就係人都知，原來佢鍾意享用美食之餘，得閒時候自己亦會露兩手，買餸親自入廚煮番幾味，但自從做埋局長之後，礙於日常公務繁忙，佢已經冇太多親自到街市買菜及下廚嘅機會，不過噚日佢出席活動，終於可以用高科技再嘗買餸樂趣。
買昆布梅頭煲靚湯
高醫生噚日擔任VTC 35周年其中一項誌慶活動、健康科技中心開幕典禮主禮嘉賓，又喺典禮後同一眾老友記試玩中心嘅虛擬實境（VR）體感遊戲，一齊喺虛擬街巿買昆布、菜心同梅頭豬肉，炮製健康靚湯。雖然高醫生已好少去街市，但仍能駕輕就熟買餸，加埋佢煮餸一向注重健康，所以與同場老友記，選出健康菜式，對佢嚟講絕冇難度。
健康科技中心設於VTC機構成員IVE葵涌院校，高永文除試玩VR體感遊戲設施，仲參觀中心其他設施，例如協助訓練長者手眼協調嘅智能運動手套、提高長者下肢活動能力嘅互動地面投影系統等，亦與在場嘅老友記傾談，了解科技如何改善老友記健康。