「識睇梗係睇留言」，睇樓市評論都係，皆因利好、利淡因素，大家已倒背如流，何況樓評以數據理性分析，但市場往往由情緒主宰，不如從留言了解群眾心態。近期多咗大量「有北水，樓價冇得跌田家同1997年樓市最大分別就係當年冇北水。
香港無疑日益受北水影響，水能載舟，亦能覆舟。2007年8月中，中國宣佈「港股直通車」，畀大陸人直接買港股，未正式通車，恒指兩個半月內已由18000衝上32000。11月初，時任總理溫家寶叫停從未開動嘅直通車，當時股評人仍好老定，指「溫總冇話唔推」，「來自QDII嘅資金仍可支撐大市」，結果唔使我多講。
2015年嘅「大時代」，始於3月底，中證監宣佈允許冇QDII資格嘅公募基金參與港股通，恒指一個月急升近4000點，之後A股爆煲，北水自顧不暇，恒指跌足一萬點至見底。
你會話樓市唔同股市，當然！唔同在股票可以隨時逃生，例如2015年6月，A股港股開始急跌，成個6月份恒指仲喺26000樓上，大把時間鬆綁。但樓呢？𠵱家上車，被SSD鎖三年，當市況逆轉想落車，辣招下成交冰封，肯定被買家狠狠鋤價。
任何市場每次有泡沫，都有「this time is different」的睇好言論，結果咪一樣係爆破。
笑笑生
mailto:[email protected]