將軍澳醫院做白內障手術竟會發生兩宗醫療事故，瑪麗醫院做換心手術，竟然發生血型錯配，換錯心臟，伊利沙伯醫院做腦科手術，右腦有事竟開錯左腦……實在匪夷所思。白內障今天係簡單不過嘅手術，在中環眼科診所需時少於30分鐘，做完就可以行出街，將軍澳醫院都會出事？間醫院及醫生搞邊科呀，真係難以服眾。瑪麗醫院更以心臟科出名，不少議員就唔睇中環名醫而去瑪麗睇心臟專家，做手術竟會擺大烏龍？總之一切都係社會嘅錯，醫護人員只係無心之失！餐飲M一次去睇醫生，約咗下午兩點半，準時到達診所，等到3點醫生還未見人，護士話：「醫生去咗福臨門食晏，趕緊返嚟嘞！」趕緊？怕係嘆緊至真，香港醫生係有資格去福臨門嘆茶嘅，病人多，醫生少，要幾嘆都可以。勤力德有一次俾醫生激死，問左丁山：「點解香港唔輸入外地醫生？」哦，佢問我，我問邊個？專業保護主義自會保障私家醫生收入及保證公立醫院人手短缺，醫護人員做到失魂，配錯血型都唔知嘅嘞。
左丁山親戚嘅阿媽做右眼白內障手術，在威爾斯醫院做完，覺得唔係幾舒服，右眼視覺模糊，唔肯再做左眼。親戚問計於左丁山，於是安排佢帶阿媽去睇香港眼科醫院中文大學眼科私家症（早一個月預約），檢查一番之後，話佢阿媽眼角膜體積細於平均數，內裏細胞數目不夠三千，又係少於平均，所以做白內障手術係會增加難度，做後會有幾日唔舒服，並非手術有錯。做完測驗，聽過教授解釋，親戚阿媽個心安樂晒，願意再在威院做左眼白內障手術。左丁山問親戚：「乜威院冇解釋嘅咩？」親戚話：「事先都冇做過類似檢查，點解釋呀！」大家講電話之日，親戚竟然係與老婆女兒在迪士尼樂園。怪而問之：「今日唔駛開工咩？」親戚話：「新年後好少開工，你有冇裝修介紹呀？問吓啲老友喇。」去年搵親佢做嘢都話唔得閒，仲以為佢好好景㖭，點知依家冇工開，真係美麗的誤會。上到陸羽，餐飲M竟然講：「我個裝修佬主動打電話嚟問有冇嘢做，相信呢行依家好淡，以前我叫佢嚟屋企執吓水喉電燈衣櫃，佢話細job唔好搵佢，依家轉晒口風，主動提出同我屋企牆面補灰水喎！」睇嚟二手樓成交冷淡，零售店舖唔妥，已連累到裝修行業不景，惡佬明又講過私人地盤開工量褪色，地基公司開始裁員，2017年香港嘅經濟未必可以樂觀。