正所謂一沉百踩，國泰（293）自金融海嘯後首度業績見紅，瞬即惹來大量批評，就連同行都贈佢一句：適者生存！
講緊嘅係澳洲航空（Qantas），行政總裁（CEO）Alan Joyce接受彭博訪問時，提及國泰舊年蝕錢，佢話對全球航空公司而言係上咗一課，就係適者生存，要適應環境轉變，及時作出應對，先至能夠度過時艱。
講得咁口響，原來Joyce正帶領澳洲航空成功轉型，同樣都係三年計劃，措施大同小異，不過明顯大刀闊斧好多。
澳洲航空一度裁走過千名員工，將舊飛機退役，停飛唔賺錢航線，同其他航空公司合作營運國際航線等等，總之目標係每年成本慳4億澳元（約23.8億港元）。澳航舊年終於迎來變革曙光，自2009年以來首度有息派。
對比國泰今年展開成本削減計劃，Joyce贈言話，澳航已經經歷咗，國泰𠵱家經歷相同過程，相信國泰品牌同管理層可以帶領集團做到咁話。