美國加息，港樓加價，這與過去數十年的樓市文化相違背，可能正因為全港經歷多次金融危機，物業先死而後生，通常谷底後勁反彈，早落車的業主後悔早賣樓，以致後來高價追回，加上近年實施的辣稅被綑綁三年，一動不如一靜，橫掂都要上番車，看漲幅不如早買早着數，免三年後又要再以高溢價買回。
坊間有不少賣了樓回購個案，都係回應一句租樓交畀業主供樓、不如當交租畀自己兼儲錢，等同作三年定期存款，𠵱家大額存款約一厘左右，收租三厘息，供樓約2.5厘，計數買樓始終有實物揸手，好似長和（001）主席李嘉誠多年話齋，「自用無防，炒賣不宜」，目前被辣稅鎖死三年，即是被迫中長線投資，或講得直接啲，迫業主賺錢，過去五年測試，賺錢的比例高達九成以上，應該多謝特首梁振英的「德政」。
本周三新盤賣近千伙，相信是自去年11月新辣招後最多的賣樓天，不需四個月時間，個市便從低位報復式反彈，是極速反彈，率先由細價樓全面上升，400萬或以下全港不足1,000個，呢啲就叫做唔跌便升畀大家睇，好彩好多市民買了個保險，在未完全趨升之前已經上車，否則一個月要畀多數十萬元樓價。
目前尚有極少數包拗頸派，指甚麼樓價牛市三期尾水、又話97翻版，用廿多年前的舊事重提，世界變了很多，資金鏈亦由歐美走回頭路至亞太區，舊事未必會回帶式出現，叫跌，「嘥氣」。
劉兆昌
資深地產傳媒人
http://www.HKLau.com
本欄逢周五刊出