「殺人放火金腰帶」，呢個世界真係幾多唔公平嘅事，好似巴西就有個叫般奴費南迪斯嘅門將，效力過法林明高同明尼路等球隊，2010年因為育有一子嘅模特兒前女友薩穆迪奧（Eliza Samudio）入稟向佢索取瞻養費，般奴就指使一個叫山度士嘅殺手殺害前女友，仲將屍體餵狗，2013年被判入獄22年，原本都合情合理，但巴西法庭竟然咁兒戲，延誤佢嘅上訴申請而獲批人身保護令（Habeas Corpus），令佢暫時獲釋。
32歲嘅般奴殺完人只坐四年出返嚟，仲獲巴乙組球隊Boa Esporte簽入，搞到多個贊助商，包括主贊助Gois and Silva宣佈，如果球隊堅持簽入佢，就會停止贊助經費，甚至連女權組織同網民都抗議，球隊官網一度被黑客入侵，薩穆迪奧個媽媽仲好難過咁講，個孫仔仍然活喺惶恐之中，每次放學都要佢同外祖父接送。般奴出席記者會就話：「就算判我終身監禁，薩穆迪奧都唔會返嚟，我只希望用餘生貢獻足球。」
