多蒙特周二喺德盃八強作客丙組仔SF洛特，呢場波原本喺兩星期前舉行，但因SF洛特個球場積雪同積水而改期。多蒙特今場踢得都幾辛苦，直至57分鐘先由基斯甸普列錫打破僵局，之後由舒賀爾尼（中）同埋舒姆沙入多兩粒，最終大勝3:0。多蒙特晉級後會同拜仁慕尼黑爭入決賽，佢哋兩隊近三次喺德盃交手，多蒙特成績係一勝兩負。