今個馬季表現最出眾的賽駒之一是吳婉芳愛駒「喜蓮獎星」，最近連勝董事盃及女皇銀禧紀念盃，是本季暫時為止，唯一贏過兩場國際一級賽之馬，周日(19日)「喜蓮獎星」將再出，角逐一班1400米，如果今場勝出兼贏埋稍後之冠軍一哩賽，便力足挑戰馬王寶座。
除了「喜蓮獎星」，吳婉芳另一匹愛駒「喜蓮彩星」，周日有更重要任務，就是配韋達出戰2000米打吡大賽。老實講，「喜蓮彩星」面對「佳龍駒」、「巴基之星」、「喜旺寶」等強敵，勢成冷門，但睇上仗表現，「喜蓮彩星」其實已大有進步，於打吡路程二班田草2000米，狀態只係初起，已後上如飛殺入第五，讓四磅之下，距頭馬「喜旺寶」不足一馬位。
既然大家認為「喜旺寶」係今屆打吡機會馬，咁冇理由「喜蓮彩星」被睇成陪跑分子。何況「喜蓮彩星」外地賽績級數極高，於去年7月在法國角逐巴黎大賽2400米一級賽高奏凱歌，係今季插班評分最高嘅自購馬，一旦開始適應水土冒勇，根本唔怕任何對手，反而最驚嘅係由韋達操刀，以佢家陣退化中嘅身手及膽識平平，跑大賽真係可能跑低啲。