Tesla推出新車款嘅頻密程度，真係拍得住蘋果公司嘅iPhone。Model 3面世未夠一年，明年將推出Model Y。鍾情Tesla嘅長和（001）大班霍建寧，換新車嘅機會又嚟喇！
日前提到「打工皇帝」霍建寧啱啱換咗架新款白色Tesla Model X P100D，一對Falcon Wing鷹翼車門打開時，霍建寧臉上流露一種顧盼自豪嘅笑容，大家都感覺到佢對部新車幾咁滿意喇。
英國汽車雜誌《Autocar》噚日話，Tesla最快2018年推出Model Y，除咗保留標誌性嘅鷹翼車門設計，仲配備Model 3嘅AutoPilot自動駕駛系統。呢部新車採用嘅電腦運算速度比上一代快40倍，係Tesla電動車中最強。
聽講新車外型係Model X同Model 3嘅混合版，每部定價4.5萬美金（約35萬港紙），較Model 3貴一萬蚊美金。不過，市場睇好Model Y銷售表現會勁過Model 3，刺激Tesla股價星期二彈升近半成，收報258美金，創一個月收市最高。