「突手」跑馬仔仲有個幾禮拜就舉行，小弟呢啲冇票人士，咪又同林狗、陶才子咁食住花生睇好戲；有候選人話如果香港市民唔滿意佢，就算當選後都會順應民意辭職喎。辭職？巴塞隆拿教練安歷基（圖）上月尾就真係辭職喇，一辭成隊巴塞當堂醒神晒，連續幾場炒對手之餘，仲可以奇蹟逆轉巴黎聖日耳門，晉級歐聯八強㖭，搞到唔少巴塞球迷擔心，如果球隊繼續贏落去，管理層會唔會挽留安歷基㗎？不過隨住作客1:2不敵拉科魯尼亞，相信球迷唔使擔心喇。
無可否認安歷基唔算係魅力型教練，作風都算係平實，之前傳佢同美斯不和，真係當故仔聽吓就算。安帥最大致命傷始終係搞唔掂球隊輪換問題，MSN一死火，球隊就多數冇料到，好似周日對拉科，一收起尼馬就出事。其實安歷基唔多唔少都俾負責球員收購嘅總監羅拔圖費南迪斯害，事關巴塞今季用左億幾歐元擴軍，仲好似話透支埋下季嘅預算，但除咗中堅烏姆迪迪，其餘都唔多掂，好似前鋒柏高艾卡沙，準備作為MSN替補，咁耐以嚟都係聯賽入兩粒，安祖高美斯作為小白接班人，亦都得啖笑。下任巴塞教練係邊個仲未知，不過佢首要任務，都係先處理一班瘀血先。
文：牽牛