政府計劃推出600部專營的士，激到的士業界紮紮跳。的士車主同司機今次眾志成城大晒冷，成立撤回的士專營權大聯盟同政府鬥過。
眼見今屆政府唔係好接受佢哋嘅意見，聯盟幾十位代表，包括身家億億聲嘅車行老闆，決定向下屆特首埋手，噚日去勻3個特首候選人嘅辦公室告定狀，鬧爆現任運輸及房屋局局長張炳良斷錯症兼落錯藥。聯盟話呀，改善的士服務，政府應該先扶持現有18,000的士先，但政府偏偏要整幾百部專營的士嚟逼死業界，聯盟仲提醒幾位候選人，下屆一定要搵個聽人講嘢嘅優質局長先掂。
但3位候選人中，最後只得曾俊華親自接請願信。薯片叔話，自己都坐過新引入嘅新款的士，希望業界可以慢慢討論，仲話「冇咩嘢解決唔到」。