卡斯拿斯喺周二場歐聯雖然幫唔到波圖扭轉敗局，不過佢就達到職業生涯另一個里程碑，皆因呢位西班牙門神以175場歐洲賽，取代踢咗174場歐洲賽嘅意大利同AC米蘭名宿馬甸尼，成為歐洲賽上陣場數最多嘅球員。
聖卡斯創歐洲賽上陣紀錄
意甲一哥祖雲達斯周二喺歐聯16強次回合迎戰葡萄牙球隊波圖，客軍喺40分鐘就有後衞彭利拿被罰紅牌離場，最終祖記靠前鋒保羅戴巴拿喺42分鐘射入12碼小勝1:0，兩回合合計贏3:0，順利出線最後八強。雖然波圖喺16強止步，不過佢哋嘅35歲西班牙門將卡斯拿斯喺歐洲賽累積踢咗175場，超越馬甸尼成為喺歐洲賽落場次數最多嘅球員。至於排三至五位嘅分別係沙維（173場）、施多夫（163場）同埋魯爾（161場）。
祖雲達斯打入八強後，佢哋嘅意大利門神保方就話唔想抽到對李斯特城。呢位喺歐洲賽踢咗146場嘅39歲球員話：「我最唔想對邊隊？咪李斯特城囉。佢哋係一支好危險嘅球隊，可以為對方帶嚟好大麻煩。」