無綫節目《香港早晨》第一代主持徐福銓（David），原來係意大利咖啡店Cova前老闆，去年將Cova賣盤畀美心集團，傳價錢高達一億元，年屆62歲嘅David現已退休，日前喺赤柱5,500呎頂層複式豪宅接受專訪，身為Cova前老闆嘅佢原來都係食神，平日有下廚煮豉油王龍蝦、炆斑頭腩，難怪廚房約300呎，大過窮人住嘅劏房。
十幾歲去英國讀書嘅David，返港後加入怡和洋行嘅洋酒部，佢話：「當時《香港早晨》搵我講紅、白酒，訪問後監製馮吉隆問我有冇興趣玩吓，以兼職身份開始主持人生涯。」當年David被喻為何守信接班人，佢謙稱：「唔敢當，我邊度有資格同何B師傅比。」曾訪問中村雅俊、張國榮（哥哥）嘅David，其後因無綫派佢主持其他音樂節目，自己正職始終做行政，所以喺86年離開無綫。
發生楊恭如被摑
36歲那年，David覺得工字不出頭，加上喺歐洲開會經常去米蘭名店街Cova，覺得幾好坐，甜品又好靚，所以將Cova引入香港，當年銅鑼灣店發生毛玉萍掌摑楊恭如事件，問到David當日喺唔喺現場？佢笑笑話：「佢哋周不時都嚟，我都見過佢哋，當年發生呢件事，我就唔喺度，啲人話之後Cova就旺場旺咗幾個月，我希望旺場唔係因為咁，如果係都唔係好事。當時好多藝人鍾意嚟Cova，例如哥哥、羅文、沈殿霞都好捧場，好不幸佢哋都過咗身。」
撰文：馮仁昭