今屆歐聯16強出現唔少逆轉勝場面，繼巴塞隆拿、多蒙特之後，周二主角就輪到英超球隊「狐狸」李斯特城，李城首回合作客以1:2不敵西維爾，次回合返回主場，就以2:0擊敗對手，最關鍵就係門將卡斯柏舒米高尾段救出12碼，李城首度參與歐聯就殺入八強，成為英超第八支歐聯八強兵（見附表），相反阿仙奴已連續七年16強出局，真係令雲格躺着也中槍。
李城賽前宣佈由莎士比亞坐正領隊至今季結束，佢同英國大文豪同姓，今場比賽又真係拍得住《王子復仇記》咁精采，27分鐘中堅韋斯摩根接應罰球傳中，近門用大腿撞入，主隊先開紀錄，由於李城有作客入球在手，呢個比分已經足以晉級，搞到西維爾要全軍進攻，令後防空虛，啱晒李城打反擊，中場馬克艾拜頓換邊後禁區頂遠射建功，幫李城鎖定勝局。
舒米高又撲出12碼
其實西維爾下半場有大好破蛋機會，80分鐘小舒米高撞跌客軍翼鋒馬捷恩佩雷斯，球證判罰12碼，好彩舒米高將功補過，撲出尼桑斯嘅施射，李城力保2:0勝果，兩回合計3:2淘汰西維爾，殺入歐聯八強，泰國班主維猜、卡斯柏老竇米高舒米高，喺觀眾席都開心到跳起。
李城成為第八支打入歐聯八強嘅英格蘭球隊，亦係第一個國家有八隊波可以躋身到呢個階段。兩回合都救出12碼嘅舒米高可謂功臣之一，佢當選今場最佳球員，賽後就話：「呢個係難以想象嘅成就，下半場我哋面對唔少壓力，好彩力保不失。」西維爾連贏三屆歐霸盃，今年終於斷纜，睇嚟佢哋都係適合踢歐霸盃多啲。
雲格睇死李城唔掂
除咗西維爾之外，被抽水仲有阿仙奴，事關李城首次參戰歐聯就入八強，相反阿仙奴已連續七年16強止步。李城領隊莎士比亞自代替雲尼亞里領軍之後，喺聯賽兩連勝，𠵱家喺歐聯入埋八強，更令雲格躺着中槍，雲格俾網民翻舊賬，摷番舊年喺李城英超封王後講過一句話出嚟，當時雲格話：「李城肯定會陷入苦戰，佢哋嘅踢法唔係以控球為主，需要消耗好多體能。如果你禮拜三晚對完巴塞隆拿，禮拜六又要踢英超，咁樣一定好難踢。」To be or not to be？其實雲格都自顧不暇，要忍辱繼續做兵工廠領隊？定拍吓屁股走人好？