賭王何鴻燊四房公子何猷君近日喺微博鬧香港航空大細超，「玩具大王」蔡志明個仔蔡加讚（Karson）噚日講開呢件事，指自己坐飛機，冇受特別待遇，冇人因為佢係「蔡生個仔」優待佢，仲讚香港機場服務好好，過海關特別快。但由於太太汪圓圓唔係揸香港身份證，所以偶爾要陪佢行外國人通道，就會排隊排耐啲。
Karson噚日係出席香港義工聯盟活動，自爆帶過兩歲幾大女Celine做過一次義工探長者，之後都唔想仔女做室內兒童，等一對孖仔Christian和Kameron大個啲，會全家出動做義工。
香港義工聯盟今年成立基金，搞活動主要靠董事會成員贊助，Karson唔肯透露贊助幾多錢，但作為常務副主席，佢就發起一項「VR說故事」短片比賽。雖然佢話自己冇拍片天份，但會幫手搵導演做評審，仲會同圓圓姐夫、「宇宙最強」甄子丹傾下，有冇機會抽時間幫手㖭。