阿仙奴喺歐聯16強出局，踢完26場聯賽又暫以50分排第五，咁差嘅表現令唔少球迷都勁不滿，希望兵工廠可以盡快將領隊雲格炒魷。近日仲有球迷喺集資網站籌旗，希望租飛機喺阿聯酋球場拉橫額嗌雲格落台，四日已經籌到超過2,500鎊（約23,800港元）！
阿仙奴球迷基斯畢拿作為「反雲黨」嘅一分子，佢喺周日就決定喺集資網站JustGiving籌旗，希望可以租飛機拉橫額趕走雲格。畢拿喺周日開始籌旗後，暫時有139人捐出2,602鎊（約24,700港元）。不過，有眼利嘅網民發現，畢拿周二將原來嘅集資目標3,000鎊（約28,500港元），突然上調到4,000鎊（約38,000港元），於是就懷疑畢拿打算乘機呃錢。