師傅話齋行走江湖最緊要有運！好似澳洲騎師柏寶咁，原本守齋近兩個月，手風曳到你唔信，偏偏佢於今晚（15日）第三場四班1200米，因鄉里潘頓臨時身體不適未能出賽，而接手蔡約翰馬房「勁皇子」行正大運。
柏寶不負幕後所托，「勁皇子」沿途前置，直路出盡九牛二虎之力，將此駒後勁盡情發揮，從而為呢匹後上馬開齋，亦幫自己打破悶局，兼勝出首度舉辦的心光盲人院暨學校120週年紀念盃，單Win及組合獨贏A1分別派41.5及17元。
今次同時係柏寶與蔡約翰呢對澳洲騎練，在2017年首度攜手建功，至於「勁皇子」第六次上陣首度入三甲，順利敲響服役勝鼓。
「勁皇子」馬主Gregory James Holmes表示十分開心，因為愛駒首捷兼捧盃，原本此馬潘頓騎，不過因感冒退下火線換上柏寶，柏寶表現十分好。蔡約翰對他表示「勁皇子」喜歡在夜間上陣，故此多跑快活谷。Gregory表示自己是加拿大人，「勁皇子」英文名NASHASHUK在加拿大是馬匹領袖的意思。
蔡約翰已經連續八個賽日贏馬未斷纜，季內累積59Win領先練馬師榜，拋離最接近的大摩剛好12場頭馬，衛冕冠軍形勢大好。
第三場前四名有冷有熱，108倍「帝勝之星」後上跑第二，和頭馬「勁皇子」構成2,037.5元Q。大熱門「八心之煌」跑第三，全場最冷148倍「勝利威」與半冷門7.8倍「多多勁驥」影相不分高下，成為平頭殿軍。