3位特首候選人噚晚喺選舉論壇激辯前夕，曾俊華喺facebook上載片段「熱身」，揀咗一啲網民對佢嘅尖銳批評作回應，「我希望今日參考外國節目，讀出一啲對我好mean嘅留言」，佢繼而讀出一個留言「戚眉戚眼、囂張浮誇、自認有為」，之後大叫「係咪（講緊）我㗎？」似乎意有所指，並做出不滿嘅表情，可謂交足戲。
面對被指同泛民蛇鼠一窩、政治利益交易，佢自稱有建制派提名；有人諷刺佢陪跑、似足上周歐聯被巴塞反勝踢出局嘅球隊巴黎聖日耳門，佢就強調最重要係「球證」公正，笑指自己似最後勝出嘅巴塞多啲，句句都可堪玩味！
佢仲話互聯網係暢所欲言嘅地方，網民毋須玩弄語言偽術，可以真心表達意見同交流，唔知係咪寸緊唔知「白色恐怖」係乜嘅林鄭？