星期一場英足盃八強，摩連奴嘅曼聯似乎學咗《少林足球》入面魔鬼隊，用殺傷戰術對付車路士，不斷踢人犯規，其中安達靴里拉仲被逐。雖然車路士最後主場贏咗1:0晉級，但領隊干地好嬲，比賽期間同摩佬口角，賽後仲怒插曼聯嚟踢人多過踢波。
干地：球員想踢波呀！
曼聯呢場作客車路士，全場捱打，成日都用粗野犯規去阻止車仔球員；其中車仔翼鋒夏薩特好似變咗做沙包，係咁俾人踢，今場六次被侵犯，冇受傷真係好彩。曼聯中場安達靴里拉係執行殺傷戰術嘅主要打手，上半場兩度侵犯夏薩特，35分鐘就兩黃一紅被逐，摩佬被迫打少個前鋒，換費蘭尼入嚟繼續粗野。
當然，某啲人眼中呢啲可能係鐵血同硬朗，但我求大俠就覺得有啲過份。如果唔係球證奧利華鬆手同走漏眼，曼聯真係唔止靴里拉被逐。曼聯今場14次犯規，係車仔嘅一倍！我求大俠記得，曼聯中堅馬高斯盧祖有吓踩咗落夏薩特度，球證冇理，唔知英足總會唔會秋後算賬；仲有右閘路爾斯華倫西亞雙腳飛鏟尼高路簡迪，牌都冇張。見到咁多爭議判決，車仔主帥干地都好躁，曾經衝去同第四裁判投訴，仲同摩佬嗌交㖭。
雖然曼聯泊大巴兼用殺傷戰術，但大部份時間踢少個，最終都阻唔到車仔贏波；簡迪喺51分鐘射入致勝一球，帶領藍戰士入四強。賽後干地話：「我嘅球員想踢波呀，但有段時間，夏薩特根本踢唔到波，我淨係見到佢係咁俾人踢。冇人可以否認呢個事實！足球係唔存在殺傷戰術，呢種唔係我嘅足球，我絕對唔認為踢人係一種戰術！」
摩佬又輸自封車仔第一
摩佬係今季第二次返史丹福橋作客，上次食四蛋，今次又輸，喺比賽中有車迷叫摩佬做猶大，而摩佬就向佢哋豎起三隻手指回應。賽後摩佬話：「佢哋鍾意叫我乜就乜啦，直到佢哋搵到個領隊可以贏到四次英超前，我都係第一。喺呢一刻，猶大係第一。如果有日有個車仔領隊四奪英超，我先跌落第二。」