憑電影《骨妹》入圍今屆金像獎最佳新演員的余香凝和男友陳家樂，前晚在吐露港公路近中文大學路段，發生嚴重車禍，余香凝面部受傷，鼻骨爆裂，要到醫院接受治療。三年前陳家樂在台灣拍電影《破風》時，亦曾與單車擦撞墮田，鎖骨斷裂。
「幾秒冇意識」
陳家樂昨接受本報電話訪問：「噚晚做完嘢接佢收工，我哋傾緊去邊度食嘢，突然間後面架車收唔切掣撞埋嚟，跟住推咗我架車埋壆，後面撞完到前面再撞，之後爆晒氣袋，嗰時都唔知發生乜事，大家都有幾秒冇咗意識！」家樂擔心女友破相，承諾會照顧她下半世：「呢段期間會搵去疤秘方。」
搭車留陰影
車禍之後，余香凝在facebook貼文報平安，昨日她到沙田仁安醫院覆診，陳家樂陪伴在側。余香凝重提車禍時仍猶有餘悸，亦因為怕父母擔心而不敢通知家人，她說：「我都好擔心個鼻有冇歪到，醫生話個鼻骨裂咗。」她坦言最擔心不能出席金像獎：「我有問醫生，4月9號乜情況，佢話唔擔保但應該唔會太差。」
其間余香凝講到想喊：「個鼻冇歪，係裂咗骨，仲有啲陰影，噚日睇完醫生，搭的士嚟都驚，聽到朋友電話都想喊，意外嘢太突然。」家樂表示短時間內不會再開車：「意外好突然，冇先兆，事發前仲係好開心，仲傾緊食乜，𠵱家都仲係好緊張。」家樂肇事座駕被指掛着P牌，他解釋：「我唔係P牌，我過咗P牌，我爸爸好多年冇揸，佢覺得掛P牌放心啲。」
據知余香凝的《骨妹》拍檔兼老友廖子妤第一時間到醫院探望，而廖子妤早前跟郭爾君為ViuTV拍攝新一輯旅遊節目《新世紀山陰戀事》時，第一次看到雪景。
採訪、攝影：吳耀輝、徐錦池