噚日係3.14白色情人節，嘉里（683）旗下九龍灣MegaBox趁十周年舉行「十全十美冰上婚禮」，畀10對新人喺MegaBox溜冰場上行禮，仲搵埋律師同見證人，做足程序，嚟個有法律效力嘅「真．結婚」，齊齊以3.14做結婚記念日，夠晒難忘。
查實MegaBox係第7年舉辦類似活動，每年都以婚禮做主題，年年各有特色，最誇試過搵嚟50對新人，即係成百人喺溜冰場舉行婚禮，不過當時只係「假結婚」，部份準新人或情侶純粹喺冰上感受行禮，並無簽紙。
至於噚日10對新人，係由EDSLife生活易幫手搵嚟，MegaBox總監文靜芝指，今次活動為MegaBox十周年打響頭炮，花近百萬元籌備，今年仲會有九項唔同活動，宣傳費約7位數字。