數碼化嘅年代，藝術都分為虛擬同實體。K11今年藝術月就以《Me: Millennials》做主題，展示新媒體藝術，同荷蘭數碼藝術家Faiyaz Jafri合作，本月21日起展出一個9米數碼互動花園，一隻3米高嘅大型數碼裝置《行動小鹿》會企喺花園內，令你估唔到嘅係，鹿仔身上每一個斑點原來都係一扇窗，參觀者向窗內窺視，會睇到一個科技化嘅起居室。
雖然大家入唔到鹿仔身體，但透過用數碼科技製作嘅短片，會模擬參觀者遊走喺鹿仔內部嘅視覺，藝術家Faiyaz Jafri希望藉此呈現人類違逆自然，但又希望擁抱自然嘅矛盾。除咗《行動小鹿》，仲有其他活動，包括藝術家方琛宇訪問陌生人嘅10段影片，以及10位千禧代藝術家舉行嘅《#like4like》新媒體展覽，有3D立體光雕、動能、影像技術等科技作品，展示虛擬同實體創作嘅跨界撞擊。