【人物專訪】
蕭定一的娛樂產業越做越大，最新加入網上影視點播平台戰場，旗下HMV數碼中國（8078）耗資億元，推出HMVOD平台，目前提供中西外語電影。他預告，未來除繼續增加電影庫外，亦將播出自家製作劇集，強調非「無綫式」兼本土化，「如角色需要嘅，對白係需要講粗口。」
蕭定一表示，早於幾年前已構思推出網上點播平台，但一直覺得時機未成熟。隨着內地翻版問題改善，加上Netflix此類平台出現，令觀眾開始習慣花錢買劇，遂於半年前開波籌備HMVOD。當然，港視（1137）早於三年前已推出網劇，但叫好不叫座，他解釋，「兩年前你叫我做我都唔做，但今日用App睇劇情況已差好遠。」
現時HMVOD提供1,500部電影，未來三個月內，電影庫將增至2,500部。另外，更已部署三至四個月後，推出自家製劇集。他表示，現時「香港冇星」問題源於電視缺競爭，「捧人最緊要靠好電視劇，其實你見好多好紅嘅藝人都係電視出嚟，好似周潤發、劉德華、黎明，但現時發牌發得少，冇競爭，唔夠好嘅劇。」
倘角色需要 對白要有粗口
他認為Netflix式影視平台已是不可逆轉的大勢，至於HMVOD的劇集「一定不會是無綫式，不會每日逐集播，而係每季一次過上。」
他強調，旗下自家製的劇本走「本土」路線，而且因為毋須受廣管局條例所限，令劇本可以有更大膽的情節，「現時就算係TVB，講句仆街都俾人投訴，但其實仆街算啲咩？」的確，如果要找世界上最斯文的黑社會，一定是TVB劇中的黑社會，粗口隻字不講，異常夢幻，「當未有三級片前，你唔覺得世界好虛假咩？講唔講粗口，係在於劇中角色身份，如果佢喺嗰個身份都唔講，咪造成戲劇性虛假。」
他表示，自家製劇集製作費「金額唔細」，至於劇集班底等細節，則會待正式推出時才公佈。他又指，只要達5萬名付費用戶，就可以收支平衡。
記者：倪敏慧
