已故樂壇天后梅艷芳母親、人稱「梅媽」嘅覃美金，多年來一直想一次過取得梅艷芳遺產，屢次興訟，最終因爭產失敗兼欠下訟費，於2012年被頒下破產令，去年4月才解除，但梅媽日前再遭兩名曾任其破產受託人的會計師Wong Teck Meng及Chan Pui Sze入稟高院申請破產，案件排期於5月10日處理。
噚日《蘋果》下晝2點幾打電話畀梅媽，原來佢入咗醫院，護士代接聽，話梅媽瞓緊覺， 等醫生簽紙可以出院。之後搵到梅媽問佢點解入院，佢話：「我腰骨痛呀！坐骨神經痛到唔行得，𠵱家又要訂輪椅坐，激唔激死我吖！」問佢入咗醫院幾耐？佢話：「幾日喇，日日做物理治療，千幾蚊一日，舊時900，𠵱家要千幾，唉，我自己都發竧呀，仲有幾日先有輪椅！」
「鍾意上法庭」
講到再被申請破產，梅媽話唔理住：「等佢出咗先同佢講，我鍾意上法庭，唔緊要，咪由佢申請囉，我唔使驚，你唔使同我驚，多謝你話我知，唔緊要啦。」問到係咪冇交會計師費？梅媽即鬧：「黐線，交佢個費，個個月要畀呀！」問到欠幾多錢，梅媽就話：「唔講喇！」
撰文：馮仁昭
