教協喺啱啱過去嘅周日舉行特首論壇，3名候選人都有出席，但火花其實唔算多，可能因為冇互相質詢環節，事後有撐林鄭嘅建制派質疑「有人」怕接受質詢，專欄作家屈穎妍更撰文指「好明顯就是hea曾（曾俊華）了」，借題發揮稱「老師被出賣」。但教協噚日發聲明指活動舉行前，就加入互相質詢環節聯絡3名候選人嘅競選團隊，收到薯片叔回覆同意，為薯片叔被屈大平反。
教協代平反
聽到呢度，咁會唔會係胡國興怕受質詢？其實胡官參選時已經講到明，想同大家辯論下，試問又點會驚？教協亦指，胡官競選辦話早於薯片叔答應前兩日，已向教協工作人員表示同意互片環節。咁到底邊個唔制？大家心中有數啦，點估到屈穎妍仲老屈人？
教協亦對此不滿，話外界對論壇不設互質環節作出嘅猜測同事實不符，強調係考慮到候選人意願，及讓台下有更多時間發問等因素，先至決定維持不設互相質詢環節嘅原有流程，似乎不滿屈小姐亂噏，唔少網民則話屈小姐冇改錯姓。
勢估唔到，呢件事都有個路人甲，皆因民主思路召集人湯家驊喺WhatsApp群組分享屈小姐呢篇文章，但竟然喺標題前加上「人渣的教協！」，激嬲唔少人。湯狀回應《明報》時話呀，自己只係分享嗰篇文，字眼唔係佢加嘅：「或者我不懂share（分享）啦，share出來的多了這幾個字，我也是share別人的」。佢表明唔係認同晒屈小姐成篇文章嘅觀點，話有時share文章，都係拋磚引玉去諗一啲問題，如果大家認為咁有問題，「我delete（刪除）它吧」。
李八方