無綫新紥花旦李佳芯，由於演技唔曳，得唔少監製賞識，先後喺《律政強人》同播緊嘅《與諜同謀》擔正做女一。
事業起飛，但同拍拖多年嘅ViuTV主持陳炳銓，有指近日感情再起波瀾。昨日有報道指，李佳芯早前受無綫高層施壓，要佢同男友關係低調處理，一嚟雙方公司屬競爭對手，二嚟男女事業差距相差一截，避免有人借故黐女友上位，所以勒令李佳芯改口向外稱自己係「單身」。而為免事業有阻滯，李佳芯惟有遵從無綫吩咐，將男友降呢為「發展中嘅朋友」。
不過，「口裡說不」嘅李佳芯，依然不時偷偷摸摸同男友出外拍拖，該報道更指李佳芯為方便同陳炳銓日對夜對，早前二人就搬到清水灣半島同居，而單位租金就由女方負責。日前二人就被影到將軍澳一商場酒樓用膳，期間李佳芯疑似向男友發脾氣，指對方吊兒郎當，唔識把握機會，被女友鬧到一面灰嘅陳炳銓，就頭耷耷聽訓話，期後二人一度冷戰，同枱食飯但各自修行，直至女方俾錢埋單，二人先一齊離開。