十磅仔見習騎師巫顯東剛戰勝出「獅子驄」及「育成寶貝」首度起孖，其中「育成寶貝」是他第一次為師傅沈集成建功，無論對巫顯東或沈集成，都一定非常興奮。
可惜巫顯東最快要下周三（22日）才能初跑快活谷，沈集成今期(15日)夜賽戰馬，仍未能享受減10磅優惠。不過小東東仍努力為沈廐賽駒服務，今早臨收操前，他騎本周三第一場四班1200米的「放下自在」作最後備戰，沈集成非常緊張，一直跟出跟入傍到實，在機坪欄邊睇完馬兒踱步熱身後，又目送牠出內圈跑道，之後再趕返馬房閘口等「放下自在」操回來，向徒弟小東東問長問短，可謂盡露搏殺手影。
「放下自在」周三將會配潘頓出賽，雖然冇小東東減10磅，但潘頓騎功當然唔止高一班啦。此駒季內曾遇大超班馬「一定賺」亦能跑第三，今仗爭四班谷草對手弱得多，有力打開今季勝門。