現年23歲嘅昆凌，前年誕下囡囡Hathaway（小周周），相隔1年多又懷上第二胎，除咗覺得佢好生養之餘，仲可以話佢係名副其實「有仔趁嫩生」嘅最佳人辦。
不過，昆凌其實喺舊年自爆患上「多囊性卵巢症」，令外界關心現正陀第二胎嘅健康。事源昆凌喺舊年11月，透露自己因為太勞累，經期不順，喺老公周董陪同下去醫院檢查，發現自己患上「多囊性卵巢症」，消息一出，好多人都擔心佢會唔會好嚴重咁，最後佢貼相上微博「報平安」，話自己病情好輕，仲話醫生建議佢，要多做運動，同唔好捱咁多夜。
翻查資料，多囊性卵巢症屬常見婦科病，醫學界估計約5至10%女性患上此症。生育醫學專科醫生蘇偉基於08年接受《蘋果》訪問時表示，正常卵巢只會有1至4粒發展中嘅未成熟卵泡，但多囊性卵巢症患者任何一邊卵巢內，會出現12粒或以上嘅2至9毫米卵泡，喺超聲波掃描下恍如一串珍珠鏈，整個卵巢嘅容積更可能超過10毫升。醫學界一直認為肥胖女士容易患上多囊性卵巢症，亦係引致不育嘅高危族；但有蘇醫生指，瘦人也會受多囊性卵巢症困擾而難以懷孕，曾有女士體重指標（BMI）喺正常水平都患上此病。