內地因為南韓部署薩德導彈防禦系統，爆出「限韓令」，南韓藝人被禁止到內地登台，連南韓熱播的綜藝節目、劇集都被下架，不過，內地韓迷當然自有解決方法，微博上私下傳播將最新一集的綜藝節目《我們結婚了》、《叢林的法則》、《Running Man》等等，而且已經配上中文字幕，明顯好有效率！
限韓令搞到韓國藝人唔可以踏足內地，《鬼怪》主角孔劉、李東旭直接將粉絲見會面轉戰香港、台灣、泰國等地，內地不少韓國娛樂網站、淘寶等都有代購門票，更有連當地住宿及機票套餐，上星期又爆出國家旅遊局禁辦韓國旅行團，相信限韓令反而令周邊亞洲地區旅遊更加火熱。
今日賭股午後急升，有傳話內地人因為限韓令走晒去澳門玩，大行本身估呢個月賭收最少升10%，3月首兩星期最新賭收，再估全個月，相信都夠靚仔。
不過，限韓令禁旅遊、禁娛樂，未禁到高科技產品，Samsung Galaxy S8傳出本月29日在紐約發佈，內地不少傳媒都收到邀請，更加有傳國行版Galaxy S8會在發佈會後如期推出。
去年中，中國因為南海仲裁案被判敗訴而掀起反美，不過iPhone 7推出後銷情正路，限韓令對南韓到底有幾大影響，相信要睇Galaxy S8的銷售數據先會一清二楚！
Melody
http://www.facebook.com/whichroad
本欄逢周三刊出