第21屆國際影視展昨日第二天在灣仔會展進行，多間電影公司都舉行記者會公佈拍戲大計。劉青雲跟導演韋家輝在英皇電影的節目巡禮中，宣佈開拍電影《神探大戰》，二人繼09年《再生號》後再合作。
「拍完Short咗」
韋家輝在台上不停吹捧青雲這位舊拍檔，他說：「當年《大時代》一個角色，佢畀到十個唔同反應，拍《神探》時大家見識佢一人分飾幾角，青雲好有潛力發揮好大，呢部戲佢都會一人分飾晒所有重案組角色，沙展、幫辦同女警由佢做晒。」不過青雲就表示每次拍韋家輝的電影，都似在考牌被試驗，他說：「拍完韋家輝嘅戲都可以退休，好似入醫院檢查咁，拍完short咗，𠵱家擔心緊部戲要點樣拍。」
青雲透露電影會於年底開工，不會刻意去想是否需要抽離，因不刻意反而容易做到。談到入行多年最辛苦的一部電影，正是與韋家輝合作的《再》片，他說：「拍感情戲唔係想像中咁易，但都係咁做，咁多年嚟最辛苦係拍《再生號》，因為劇情感動到我，但拍戲需要理智。」
華哥玩忘年戀
同場還介紹即將62歲的任達華會跟32歲的衛詩雅合作拍《我的情敵女婿》，上演一段忘年戀。問戲中是否有親熱戲？衛詩雅笑言不知道：「拖手啩，因為自細睇佢電影大，𠵱家做情侶，好得意。」不過最激的預告片要數周柏豪跟蔡卓妍（阿Sa）合作的《原諒他77次》，有不少床戲及咀嘴戲，阿Sa說：「我哋喺戲入面原本係床戲，但最後就變咗嗌交囉！」
另外，古天樂跟兩位小演員劉楚恬及黃星羱為《喵星人》宣傳，古仔笑言小演員拍到一半已肥了一圈，他說：「因為片場拍屋企戲為主，有好多零食，又多住家飯，拍到一半要嗌佢減肥。」他又透露有多場跟戲中太太馬麗的咀戲，因為不停NG，變成他從影以來最多咀嘴的電影。
採訪：張俊銘
攝影：陳順禎
