又到3月，又係打工仔伺機跳槽嘅旺季。熊麗萍（Conita）沉寂一段時間，近日終於揭盅，原來新東家係鼎成金融。
近月已經有連敬涵（Kingston）過檔小牛金服、大隻佬郭Sir郭思治過檔民眾金融（279）旗下民眾證券，本來大家都估估吓，唔知Conita去邊，原本佢都想低調啲，但一大班老友日前送晒花牌賀佢加盟，好消息始終冚唔住。
佢喺兩份工之間，放咗自己幾個月大假，去吓日本韓國旅行輕鬆吓。至於新工作做乜，就遲啲先可以分享，而人工方面，當然係好過以前先會過檔啦！
Conita原本喺匯業證券做咗差不多10年，轉投友達資產管理（現稱亞投資產管理），到舊年底終止，以前做開資產管理，相信新工都離唔開呢個範疇，鼎成金融亦係行內相對低調嘅經紀行，唔知請咗口齒伶俐、對慣鏡頭嘅Conita返去，會唔會有微妙嘅改變呢？