每年一度香港國際影視展昨日在灣仔會展舉行，擔任影視娛樂大使的黎明（Leon）、財政司司長陳茂波、商務及經濟發展局局長蘇錦樑等都有出席開幕禮。影視娛樂大使Leon為活動用急口令拍攝宣傳片，他昨日在台上分享說：「成班同事開會，有好多嘢要表達，但點都講唔晒，另一個創意團體諗到，將每個部門名講晒出來，推廣要盡責，時間有限制，所以30秒講晒出嚟係極限。」全程逗留不夠半粒鐘，Leon就快閃了。
搵替身做翻騰
接住「澳門古天樂」周焯華（洗米華）與香港古天樂一起為動作片《貪狼》出席記者會，《貪》片由葉偉信執導，武指是洪金寶。洪金寶在台上大讚古仔是近十多年罕有出現的武打巨星，古仔說：「今次好艱難，我本身唔係動作演員，有場要打十幾分鐘，洪金寶大哥安排咗武師拍，剪埋片加埋配樂畀我睇，拍到我好似好好打。今次算係我從影以嚟首次拍動作片，一個打十幾個，只受皮外傷。」
問古仔是否要挑戰宇宙最強甄子丹地位，他笑言：「我只係分開打十幾個，一個最多打四個，開頭大哥叫我打，我眼珠都跌埋出嚟，我唔信自己做到，當中九成自己做，只有翻騰動作要替身。」林家棟則指在戲中要以泰語講對白。
之後古仔和林家棟又與劉青雲及張晉為銀都新片《毒．誡》出席記者會，《毒》片是以慈雲山十三太保中的「茅躉華」傳奇故事改編，青雲於台上說：「演陳慎芝冇壓力，故事好特別，好多人曾經做錯事，但可以重新做人，世界缺少嘅體諒同寬恕。」古仔由警察演變為毒犯，林家棟於戲中演基哥李兆基。
青雲怕被象咬
青雲主演的另一部片《我的寵物是大象》遠赴西雙版納取景，全片他要以普通話講對白，他說：「我拍時有啲驚，因為要將手放入大象口，假如牠殺了我，香港就少一個影帝。」
採訪：張俊銘
攝影：葉君海、陳慧安