【本報訊】建制派選委都有「自決派」？「係呀，有啲人都話佩服我可以自決㗎，哈哈」。工業界（二）選委沈運龍堅持逆西北風，提名新民黨葉劉淑儀選特首，最終心儀人選閘前敗陣，他卻贏得有情有義的掌聲。自稱是「崇尚自由的建制派」，沈運龍不認為中聯辦意見是至高無上，亦寄語建制派勿搞錯，「中聯辦唔係香港嘅管治團隊」。
「佢哋唔係管治班子」
「我諗有啲壓力，係自己形成嘅箒」。未有西瓜靠大邊，堅定不移撐葉太，自稱「好儍、好蠢」的沈運龍，近期在政圈人氣急升，「有啲全國政協委員都畀訊息我，話真係識得我太遲……有啲話識咗你咁耐，唔覺得你咁高尚情操……明知不可為而為之，（佢哋話）我哋又鍾意咁樣揸緊宗旨噃」。
他不諱言有些言論，建制派未必啱聽，例如對中聯辦的重視程度，「我都講過，中聯辦係有同大家傾選舉，講埋支持邊個人，但佢哋冇逼大家喎、冇搵支槍指住大家喎、冇話你唔跟佢提名有乜後果」，但最終卻是建制選委一窩蜂提名林鄭月娥，而他接觸到的工商界，「起碼三四成人屬意葉劉……真係好奇怪嘅現象」。
沈運龍相信，部份人對中聯辦的角色有錯誤觀感，以商會、組織舉辦典禮活動為例指，「事無大小都請中聯辦官員，香港嘅處長、秘書長等官員都要靠邊站，喂，邊個係管治緊香港？大家要搞清楚噃！佢哋（中聯辦）嚟係好啱，因為作為一個嘉賓嚟溝通，但唔係下下要騎住、要override（凌駕）喺香港處事嘅官員」。
他認為，「當中聯辦嚟主禮，港官只係做陪襯，就會令我哋以為一定要聽中聯辦講咁」，強調無論建制派抑或中聯辦，都要調整心態及手法，「唔好畀人錯覺，中聯辦係管治班子，佢哋只係負責溝通」。
雖則外界盛傳若不跟中央意向提名，會被秋後算賬，生意亦靠內地的沈運龍不擔心，反認為：「（市民對）中國冇嘢好驚㗎，唔應該一聽到大陸、聽到中聯辦就覺得係負面。」他認為中聯辦要多點與學生溝通，讓他們更了解中聯辦與中國的國情，並指民主派不應以破壞形式爭取民主，指2015年若對政改方案「袋住先」，由300萬選民選特首，選戰更有意義。
■記者許偉賢