新任特首上場後，一定大換班。行政會議召集人林煥光（WK）已經等待卸任後嘅美好時光，佢接受電台訪問時話笑稱做行會召集人唔係「太得閒」，期待4個月後回復自由身「真真正正清閒」，表明唔考慮續加入行會，已經諗緊「7、8月去邊度旅行」。
否認同林鄭心態相似
但之前盛傳林鄭搵過埋班喎，主持噚日仲話WK嘅心態同林鄭之前嘅心態相似，但WK即刻否認：「唔同，佢後生過我，有機會繼續打拼吓。」咁係咪任何公職都唔會擔任先？WK只稱「年紀有番咁上下，好珍惜時間」，仲話香港能者多得很，唔需要搵佢，最好增加年輕人同女性比例。睇返WK都係65歲箒，按家陣標準唔算老噃。
WK亦同時為梁振英平反，問到CY喺行會係咪成日一意孤行時話呀，對方從來唔會半途打斷成員發言。