呢個世界有唔少工種，都有少許如運動員嘅特徵，經常面對挫折，心情似過山車，面對壓力都要當食生菜，唔係人人承受得來。最常見有全職炒股同做Startup，其中短炒搵食的，可能今日持倉爆升，興奮得一時，聽日跑輸大市或一高追即揩嘢，由天堂跌進地獄，後日可能錯有錯着贏返轉頭，途中一樣磨練意志。
為咗減少折磨自己，有部份成功投資者以較長線操作，以減低出錯機會，呢一點係長線投資相對短線投機嘅優點，話晒都係人，難免做多就錯多。
由2011年歐債危機過後，短線投機算係王道，最經典莫過於港股大時代極為短癮，有食唔食，盈利就咁蒸發。去到今年，港股明顯上升，但股份一打穿支持位，每次一驚就沽，股價又隨時見底回升。今轉港股調整途中，遇上第一日反彈，科網股、內房股以至商品股，唔係破頂就彈返上接近高位，呢個係動力嘅象徵。究竟係咪時候由快閃黨轉為練坐功？實在考起唔少投資者。
市場已率先反映美國加息機會100%，挨近議息，港股就當壞消息出盡咁炒。加息已消化，但未足以成為驅動整體港股破頂要素，暫時可睇成上落市，好多人話上落市能夠低買高沽，但高低位從來難以捉摸，有幾可做得到？
與此同時，強股可能喺恒指上落市期間，已向上拋離到冇雷公咁遠，等市況回穩先買？可能太遲了。其中一個貼地啲嘅方法，做簡單的事，有心水中長線強股，見調整就分注買，lead得住咪由佢繼續去，make it simple。
晉佳
http://fb.com/advanceguy1