家陣啲樓盤名真係令人長知識。豐泰同田生合作發展嘅馬頭角住宅項目噚日舉行命名儀式，改名「銅璵Patina」，又係用埋啲好似好獨特嘅字眼，發展商解讀「璵」嘅發音係「余」，寶玉咁解，銅係建築設計嘅主調，樓盤前臨九龍塘，位處41名校網，係好珍貴罕有咁話喎。
發展商誇下海口，指家陣位處41名校網嘅現樓絕無僅有。41校網名校林立，包括瑪利諾修院學校、喇沙小學、拔萃小學等。
另一珍貴係樓盤建築設計，出自著名設計師曹慰祖手筆，佢有唔少名人客戶，例如奧斯卡影后梅麗史翠普，代表作包括北京故宮博物院建福宮，家陣喺美國哈佛大學設計研究院教書。哦，明晒，咁即係呎價起碼都要2、3萬喇。